Família ida iha Ermera simu uma foun husi Prezidénsia, maibé inan Berta de Jesus mate molok konstrusaun remata

Smnewstl.com—Inisiativa Prezidénsia Repúblika atu fó apoiu ba família vulnerável iha Ermera enfrenta reálidade triste, depois de Sra. Berta de Jesus, ho idade 63, destiñu sedu tiha, antes uma foun ne’ebé konstrui ba nia familia ne’e remata.

Uma foun ba família Defisiensia-Matan, Sr. José Maria Sarmentu no nia ferik oan, Berta de Jesus, uma ne’e konstrui iha Aldeia Coliate-Leotelo, Hatulia, Ermera. Progresu konstrusaun foin atinji 50%, no família seidauk bele utiliza uma ne’e. Maibé iha loron Kinta (28/08), oras 20:00, maktoba Berta i’is kotu tanba moras ne’ebé nia sofre durante tinan ida resin ona.

Maktoba Berta de Jesus, ne’ebé moris iha 19 Abril 1962, husik hela oan nain rua — ida ajuda inan-aman iha to’os laran no ida seluk serbisu hanesan motorista/konjak.

Familia Sarmentu deklara nia tristeza profunda tanba lakon inan no membru importante iha família, maibé mos reafirma sei kontínua simu apoiu ba remata uma foun ne’e husi Prezidénsia Repúblika.

Parte Prezidénsia Repúblika, liu husi Unidade Servisu Sosiál, konfirma ona katak konstrusaun uma ne’e sei kontínua nafatin, maski família ne’e hasoru situasaun todan no triste.

Prezidénsia Repúblika mos sei oferese kaixaun ba família matebian, ho osan $500 ba funeral no ajuda nesesidade seluk. . (*/Smnews)