Smnewstl.com – Prezidente José Ramos-Horta hato’o palestra ida ho títulu “Damei ha Mundu Kontemporáneu” iha Institutu Internasionál no Estratéjiku Estudu Bangladexe nian (BIISS) iha Dhaka.
Iha nia diskursu, Prezidente Ramos-Horta ko’alia kona-ba konflitu globál oioin, inklui funu Ukránia-Rúsia, krize sira iha Síria no Israel-Palestina, no situasaun iha Myanmar. Nia subliña papél Konsellu Seguransa Nasoins Unidas nian no kritika líder mundiál sira tanba sira nia falta sira iha prevensaun konflitu.
Prezidente destaka mós signifikadu hosi kooperasaun rejionál, hodi espresa otimizmu kona-ba adezaun antesipadu Timor-Leste nian ba iha Asosiasaun Nasaun Sudeste Aziátiku nian (ASEAN) iha tinan oin.
Xefe Estadu mos aborda krize Rohingya nian, nia subliña nesesidade mos atu rezolve kestaun ida-ne’e hodi garante estabilidade rejionál.
Prezidente Ramos-Horta elojia mos Xefe Konselleiru Governo Bangladeze nian (PM Interinu) Profesór Muhammad Yunus ba ninia esforsu globál hodi hamenus kiak liu hosi inisiativa mikrokréditu. Xefe Estadu lembra wanhira nia konvida Profesór Yunus mai Timor-Leste iha 2004 hodi introdús mikrokréditu no marka inísiu ba programa sira iha Timor-Leste.
Reflete kona-ba Timor-Leste nia progresu dezde hahu independénsia iha 2002, Prezidente Horta mos nota ho Timor-Leste nia avansu signifikativu sira, inklui habelar kobertura eletrisidade besik 97% hosi total populasaun Timor nian no hasa’e esperansa moris hosi idade-60 mai kraik ba to’o idade-70 liu.
Durante nia vizita, iha agenda loro-kraik nian Prezidente Ramos-Horta mos halo audensia seminar ho estudante sira no lider juventude sira hodi subliña importánsia lideransa nian entre juventude sira hodi hasoru dezafiu doméstiku no internasionál atuál sira.
Programa ne’e hahu, loke ho Kántiku Timor nian “Oh… Timor” ne’ebé hananu husi Sr. Ego Lemos nu’udar Enviadu Espesiál no embaxadór Boa Vontade ba Meiu Ambiente no Rekursu Be’e.
Hafoin ne’e Prezidente Horta halo ms Audensia ho Estudante Timor-oan sira hamutuk nain-10, ne’ebé dadaun ne’e hala’o estudu universitáriu iha Bangladesh. Estudante sira kontente bele hasoru malu direta ho Prezidente Repúblika hanesan mos Líder Mundial, hodi fahe sira nia esperiensia no prekupasaun.
Xefe Estadu no Laureadu Nobel ba Pás J. Ramos-Horta vizita ba Bangladexe subliña kompromisu atu hametin relasaun bilaterál sira no esforsu kolaborativu hodi rezolve dezafiu globál sira. (*/Smnews)