Smnewstl.com —Ministra Edukasaun (ME), Dulce de Jesus Soares akompaña hosi asesora Kirsty Sword Gusmão no dirijente sira aprezenta rezultadu ezame nasionál tinan 2024 bá Primeiru-Ministru (PM), Kay Rala Xanana Gusmão molok anunsia bá públiku.
Ministra Edukasaun ho ekipa haksolok tanba hetan apresiasaun hosi Xefe Governu no enkoraza atu servisu maka’as liu-liu halo análiza bá dadus no valór estudante sira nian, haree mós posibilidade formasaun ne’ebé presiza fó bá professór sira, hodi hadi’a di’ak liu-tán prosesu aprendizazen iha Timor-Leste (TL).
“Ami haksolok tebtebes tanba bele hetan apresiasaun di’ak hosi Primeiru-Ministru. Ita haree katak, prosesu aprendizazen iha mudansa signifikativu liu-liu professór no estudante sira,” Ministra Dulce de Jesus Soares hateten iha Palásiu Governu, sesta (13/12/2024).
Hosi apresiasaun ne’e, fó esperansa ida bá Ministériu Edukasaun katak, intervensaun balun ne’ebé halo fó duni impaktu di’ak.
Hafoin aprezenta bá Primeiru-Ministru, ekipa ne’e kontinua kedan halo anunsiu afisialmente bá rezultadu ezame nasionál. (*/Smnews)